Den 20. Oktober 2021 hate Vertrieder vun der Asbl “Energie mat Verstand” eng Reunioun mat der Madamm Carole Dieschbourg, a Begleedung vun 2 vun hire Beroder, am Ministère fir Ëmwelt, Klima an nohalteg Entwécklung (MECDD).

Elei déi verschidden Themaen respektiv Doléancen déi ugeschwat goufen:

1. Historik vun der Asbl

2020 gouf publik, datt d‘Gemengen Dikrich an Ettelbréck e Projet hätten, eng Wandmillen op Ettelbrécker Gemengenterritoire, just 750 m viru Wunnenge vu Bierden (Gemeng Ierpeldeng/Sauer) opzeriichten. An deem Kontext huet d’Ettelbrécker Gemeng am Juli 2020 eng Kommodo-Incommodo Prozedur ageleet.

Eis Vertrieder hunn ernimmt, datt 93% vun de Stéit vu Bierden – laut enger vun Haus zu Haus Ënnerschrëftesammlung am Juli an August 2020 – net mat dem Projet vun der geplangte Wandmillen averstane sinn. Dorops hi gouf d’Biergerinitiativ ‘Energie mat Verstand Asbl‘ gegrënnt. Den Objet vun der Asbl ass d’Fuerderung vum ‘Principe de précaution’, dee soll applizéiert ginn, fir vun ekologesche Projekter Gesondheetsschied a soss negativen Impakt op d’Liewensqualitéit vun de betraffene Bierger an der Ëmwelt, auszeschléissen.

2. Kommodo-Inkommodo: Héierbare Schall, Infraschall, verschidden Etüden

De Georges Pott vun der Asbl, Baubiolog, dee sech schonns 30 Joer mat alternativen Energien a mam ökologesche Bauen a Wunne befaasst, huet eng Rei wichteg Erklärungen ginn, déi mir hei integral publizéieren, well s’erlaben d’Problematik an d’Risiken vum geplangte Projet besser ze verstoen.

Negativen Impakt vum Infraschall op d’Gesondheet

De Georges Pott huet déi 40 db(A) Lautstäerkt aus dem Kommodo-Inkommodo, déi just mat enger Drosselung anzehalen ass, thematiséiert. Dono huet hien den Infraschall, dee jo vun enger Wandmillen ausgeet, beschriwwen an erkläert wéi e sech op de Mënsch auswierkt, wann eng Wandanlag sou no bei den Haiser steet.

Hien huet bedauert, datt am Kommodo, weeder den déiwen Infraschall nach den Kierperschall berécksiichtegt goufen. Virun allem den Infraschall vun 1 bis 8Hz ass biologesch wierksam, och iwwer grouss Distanzen. Duerch de Buedemschall kann et bannen an de Wunnengen zu raumakustesche Réckkopplungen a Verstäerkunge kommen, di méi héich kënne sinn, wéi am Bausseberäich.

Hie weist drop hin, datt wat den Infraschall ugeet, hei zu Lëtzebuerg keng Gesetzgebung besteet an d’DIN op déi sech an den Etüde baséiert gëtt, vun 1997/98 datéiert. Dës Norm misst onbedéngt un déi tëschenzäitlech Gréisst-/Héichtverännerung an technesch Entwécklung vun den haitege Wandmillen, déi méi performant wéi virun 20 Joer sinn, ugepasst ginn.

Des Weideren huet hien d’Mme Dieschbourg aus hiren Äntwerten op parlamentaresch Ufroen, zitéiert. Virun huet hie verschidden Etüden, déi d’Mme Dieschbourg ëmmer rëm an hiren Aussoen zitéiert, kritesch hannerfrot.

De ‘Principe de précaution’ applizéieren

Als Conclusioun sot de Georges Pott, vu datt et keng Laangzäitstudien iwwert den Afloss vum Infraschall op d’Gesondheet vun de Mënsche gëtt, misst de “principe de précaution” gräifen an dat kann nëmmen heeschen, datt eng Wandanlag wéinstens 1,5 bis 2 km vun den Haiser ewech muss stoe kommen, fir d’negativ Auswierkungen op de Mënsch op ee Minimum ze reduzéieren.

D’Mme Dieschbourg huet geäntwert, si hätt méi rezent Etüden, notamment eng Finnesch an eng Däitsch, wouvunner si awer d’Referenzen net matgedeelt huet.

3. Kommodo-Inkommodo: Keng Consultatioun vun de Betraffen, zweiwelhaft Etüden iwwert Vigel, asw …

Consultatioun vu berodend Biergerforen net vun der Ettelbrécker Gemeng erwënscht

De Bert Wolff, Ëmweltwëssenschaftler, Member vun der Asbl an der Ëmweltkommissioun vun der Gemeng Ierpeldeng/Sauer, huet bedauert a betount, datt weeder ee Klimateam nach eng Ëmweltkommissioun, weeder op Nordstadniveau nach op lokalem Gemengenniveau, an de Projet implizéiert gouf. Hien huet drop higewisen, datt an der Kommodo-Prozedur kee gudde Wëlle vun der Ettelbrécker Gemeng do war, fir de Leit entgéintzekommen, notamment d’Etüden digital zur Verfügung ze stellen, an dat grad am Lockdown. Sou eng Aart a Weis fir virzegoen ass de Géigendeel vun Transparenz a vu Biergerparticipatioun an dréit wesentlech zur Inakzeptanz vun dësem Projet bäi.

Qualitéit vun der Ëmwelt – Etüde a Fro stellen

Dann huet hien d’Qualitéit vu CSD Ing. Conseils hirer Ëmwelt-Etüd a Fro gestallt. Ënnert anerem huet hie monéiert, datt de Wee fir d’Camionen, deen an der Etüde studéiert gouf, aus technesche Grënn onméiglech dee Wee ass dee fir de Projet zréckbehale gi wäert. D’Verleeë vum Stroumkabel op Waarken wäert onméiglech kënnen d’Konditioun anhalen, fir 5 Meter Ofstand vun de Beem ze respektéieren. Hien huet drop higewisen, datt zemools beim Fliedermausmonitoring, d’Daten sou onkomplett sinn, datt ee kaum nach vu wëssenschaftleche Fakte schwätze kann. Hien huet eng Foto virgeluecht, wou 5 – 7 Roudmilanen iwwert engem Feld zu Bierden fléien, nodeems gedrescht gouf. De Monitoringdate vun der Studie no dierft sou eng Unzuel do net virkommen. Och de Fait, datt d’Ierpeldenger Ëmweltkommissioun Gräifvigelstaangen an Zesummenaarbecht mat der ANF um Plateau opgeriicht huet, fir de Rodentizid-Asaz ze verréngeren, ass ugeschwat ginn. Dës Staange si reegelméisseg vum Milan besicht an et stellt sech d’Fro, ob déi rëm musse wechkommen a wien dann dofir responsabel ass.

Ee vun der Ministesch hire Beroder huet bemierkt, datt bei onkompletten Daten ëmmer vum “worst Case“ ausgaange gëtt.

Et gouf zréckbehalen, datt op d’Resultater vun der Ëmweltstudie iwwert den alternative Site ‘Leezefeld’, proposéiert vun der Gemeng Ierpeldeng/Sauer, muss ofgewaart ginn, éier Konklusioune fir oder géint dee Site kënne vum Point de Vue Ëmweltimpakt, gezu ginn.

4. Puer Remarken

Suergen (Bedenken) wéinst de Gesondheetsschied fir Mënsch an Déier

Grouss Suergen iwwert den Impakt vun der Wandmillen sou no un de Bierdener Haiser, maache sech d’Famillen déi am noosten vum geplangte Site wunnen. Eng betraffe Famill, déi nëmme 750 m vun der 230 m héijer geplangter Wandmillen ewech wunnt, mécht sech grouss Suergen, besonnesch well ee vun de Kanner eng Trisomie 21 huet a mam Häerz operéiert ass. D’Wandmille kann en negativen Impakt op d’Häerzleeschtung hunn an Häerzprobleemer verursaachen.

Och beim Reit- an Therapiestall, deen 1 km vun der geplangter WKA steet, muss ee sech froen, wat den Impakt op d’Päerd ass an op d’Reittherapie déi do mat behënnerte Mënsche gemaach gëtt.

Net vergiessen däerf een, de pulséierenden, héierbare Kaméidi – a reegelméisseger Kadenz, 24 Stonnen Dag an Nuecht, dat ganzt Joer laang – dee vum Rotor aus Wandrichtung kënnt. Als Verglach, e Krunn deen an engem Stéck drëpst oder e Frigo deen di ganzen Zäit leeft.

Aussoen vum Ettelbrécker an Dikrecher Buergermeeschter iwwert de Site

Am Juli 2020, bei der Informatiounsversammlung, sot de Buergermeeschter vun Ettelbréck, “ech si mir bewosst, datt et eng Zoumuddung fir déi Bierdener Leit ass”…

An engem Interview op RTL am September 2020 sot hien och, datt et e Projet als Nordstad soll sinn, … dat een och déi aner Nordstadgemenge misst kucken…

Méi Infoe vum Ettelbrécker an Dikrecher Buergermeeschter fënnt een op: https://www.rtl.lu/news/national/a/1582147.html

5. Geplangten Nordstadfusioun, Wandmillen, alternative Site, politesch Decisioun

Ofschléissend hunn déi 4 Vertrieder vun der Asbl mat der Ministesch Dieschbourg iwwert d‘Fusioun vun de 5 Nordstadgemengen an dem geplangte Referendum diskutéiert.

Et gouf rappeléiert, datt déi Gréng aus der Nordstad gefuerdert hunn, de Wandmille Projet viru Bierden vun de Gemengen Ettelbréck an Dikrech falen ze loossen an e gemeinsaamt regionaalt Energiekonzept auszeschaffen.

D’Madamm Dieschbourg wëllt, datt eng Wandmillen opgeriicht gëtt. Si seet, datt Lëtzebuerg weider Wandmille brauch, fir d’Klimaziler ze erreechen an op d’Atomkraaft muss verzicht ginn.

D’Ministesch sot weider, datt nach 2 Etüdë gemaach ginn: Déi eng ass d’Mesüre vum Radon an déi aner vum “Son et infrason”.

Den alternative Site ‘op Leezefeld’ gouf vun der Ierpeldenger Gemeng proposéiert, awer et ass eng politesch Decisioun, fir Ierpeldeng un dem Wandmilleprojet participéieren ze loossen.

‘Leezefeld’ muss gepréift ginn, punkto Naturschutzgebitt.

De Ministère préift d’Critèrë vun de Gesetzer. De Buergermeeschter gëtt d’Baugeneemegung.

Nieft dem Prozedural gëtt et déi politesch Dimensioun.

D’Mme Dieschbourg huet dovunner geschwat, all Uertschaften u Bord ze huelen an och de politeschen Dialog ernimmt. Si encouragéiert eng Reunioun mat de Buergermeeschter vun den 3 Gemengen (Dikrech, Ettelbréck, Ierpeldeng) ze maachen.

Mir hunn eis de 14.07.2021 mat Vertrieder vu Soler am Centre Culturel zu Bierden getraff fir eis iwwert den aktuelle Stand vum Projet auszetauschen.

D’Entrevue war vu Soler initiéiert ginn, dat ënnert anerem well si net ganz frou mat eisem Artikel “Soler brécht d‘Wuert” waren.

Nodeems béid Säiten nach eng Kéier hire Point de vue zu den Themen Infraschall, Schattenwurf a Kaméidi ausgetauscht haten, an et dobäi leider zu wéineg Konsens koum, ass et dunn ëm den eigentleche Sujet gaangen, nämlech den alternative Site “Um Leezefeld”.

Soler huet ganz kloer betount, dass:

1. Si just un ENGEM Site festhalen! Wann den alternative Site also weider vun der Politik ënnerstëtzt géing ginn, da géingen si d’Wandmille “Auf der Hasenbach” viru Bierden fale loossen!
2. Soler ass NET responsabel fir de momentanen Echec vum alternative Site “Um Leezefeld”! Villméi ass et sou, dass hir Partner an der Wandpark Nordenergie S.A. – also d’Gemengen Ettelbréck an Dikrech – de Projet weder politesch nach finanziell ënnerstëtzen!

Domat huet Soler ganz kloer de Ball zréck un déi politesch Responsabel gespillt.

D’Bild wat sech eis lo no dëser Reunioun stellt ass folgend:

• Den Ierpeldenger Buergermeeschter huet eis wärend der Informatiounsversammlung de 05.05.2021 hei zu Bierden erzielt, dass de Wandpark Nordenergie S.A. wollt, dat d’Gemeng Ierpeldeng all d’Käschte vun den Etuden vum alternative Site iwwerhuele soll, allerdéngs ouni finanziell Urecht op d’Exploitatioun! Doropshin hätt d’Gemeng Ierpeldeng entscheet, d’Ënnerstëtzung fir de Site falen ze loossen.
• Soler behaapt, Ettelbréck an Dikrech géingen den alternative Site net mat virun dreiwen, sou dass Soler eleng a finanziell Virleeschtung fir all Etude goe misst.

Wann ee lo probéiert en Duerchbléck an den Dschungel vu verschiddenen Aussoen ze kréien, mat deene mir eis an der läscht konfrontéiert gesinn, dann ass eise momentane Fazit:

• Soler sicht no enger Léisung, och am Sënn vun eis Bierdener Bierger, mee déi politesch Responsabel aus de Gemengen Ettelbréck, Dikrech an Ierpeldeng gi sech net eens. Hei schéngen ënnerschiddlech Interesse virzeleien. Ëm wat fir Interessen et sech hei konkret handelt, doriwwer ka jiddweree selwer spekuléieren.

Eent ass awer kloer, déi Interessen, déi zur Zäit vun de 2 groussen Nordstadgemenge vertruede ginn, huele keng Récksiicht op eis ugrenzend Bierger, mat deene si jo awer gären deemnächst fusionéiere wëllen!

Mir ginn d’Hoffnung awer net op, dass hei nach en Ëmdenke stattfënnt an den alternative Site “Op Leezefeld”, deen och an eisen Aen eng tolerabel Alternativ zum aktuellen Site “Auf der Hasenbach” viru Bierden ass, z’iwwerdenken, well:

• déi noosten Distanz bis bei déi éischt Wunnengen méi wéi dat Duebelt ass
• de Wand vun de Wunnengen wech, also a Richtung Wandmille bléist, an domat de Kaméidi reduzéiert
• de Sauerdall – 150 m méi déif – den alternative Site vu Bierden trennt, soudass d’Nuisancen vun Infraschall a Kaméidi reduzéiert ginn
• kee Schattenwurf besteet well d’geografesch Lag vun der Wandmillen nordëstlech resp. nërdlech vun de Wunnengen ass.

Doriwwer raus kënnten d’Buergermeeschtere vun Dikrech, Ettelbréck an Ierpeldeng beweisen, dass si et eescht mengen mat der Liewensqualitéit vun den Bierger aus der Nordstad an kënnten esou ee gemeinschaftleche Energie-Projet fir all d’Nordstadgemenge an all hir Bierger decidéieren. Mee dofir mussen d’Gemengeresponsabel vun Dikrech an Ettelbréck de politesche Wëllen hu fir an dësem Fall eng akzeptabel Léisung fir déi concernéiert Bierger ze fannen.

Mir haten dowéinst de 26.07.2021 e Rendezvous mam Ierpeldenger Schäfferot fir iwwert déi Thematik ze schwätzen. Affaire à suivre…

(Den Artikel “Soler brécht d’Wuert – lo 2 Wandmillen an der Diskussioun!” hu mir opgrond vun eisem Gespréich mat Soler an hirer Richtegstellung vum Site geholl.)

E puer Remarquen zu der Äntwert vun der Madamm Lenert  op eise Bréif vum 8. März 2021.

Am Ufank schreift d’Madamm Lenert: „[…] le nombre d’études scientifiques «peer-reviewed» et publiées dans des journaux scientifiques n’est pas suffisamment important […]“

Wéi vill Etudë mussen et dann «peer-reviewed» sinn, fir datt de Ministère et wichteg fënnt fir Conclusiounen iwwert den Infraschall-Kaméidi ze zéien? D’ANSES-Etude ass onses Wëssens och net «peer-reviewed» a gëtt awer bei all parlamentaresch Ufro zum Thema Infraschall quasi als eenzeg vun de Ministeren zitéiert. Dobäi ass et eng vum franséische Staat beoptraagt Etude déi jo kaum eent anert Resultat ka brénge wéi, datt et keen Zesummenhang tëschent Infraschall aus Wandmillen a gesondheetleche Problemer gëtt. Der Santé geet eng eenzeg staatlech Etude also duer fir ze behaapten, datt et keen „effet sanitaire“ gëtt.

Weider ze liesen ass: „…le manque d’études épidémiologiques …demande un recours au principe de précaution”.

D’Etude vun der ANSES gesäit keng gesondheetlech Gefore vun Infraschall, de Ministère recommandéiert de „principe de précaution“ an d’ANSES fuerdert ee bessert Abannen an Informéiere vun de Bierger  bei Wandmillen-Projeten! Gesäit esou de „principe de précaution“ aus? Firwat recommandéiert d’ANSES  den Ofstand zu Wandmillen net ze änneren an un de bestoende franséische Gesetzer alles beim Alen ze beloossen, obwuel si och fannen, datt méi medezinesch an epidemiologesch Laangzäitenquêtë misste gemaach ginn. Wéi schéin ass dee principe dach an der Schwäiz formuléiert: „Le principe de précaution est applicable lorsque les certitudes scientifiques manquent ou sont insuffisantes pour prouver la relation de cause à l’effet et que, simultanément, de sérieux indices font craindre un risqué important pour la santé de l’homme et des animaux ou pour l’environnement. En cas d’incertitude scientifique, il y a un droit, voire une obligation, de prendre des mesures préventives. L’application du principe doit obéir à des processus transparents et conformes à l’Etat de droit.”

D’Madamm Lenert fënnt, datt et net genuch wëssenschaftlech Etuden existéieren, déi den „effet sanitaire“ vu Wandmille beweisen, recommandéiert also (ganz richteg argumentéiert!) de „principe de précaution“, mee dee besteet fir si dann an enger besserer Biergerinformatioun a Biergerbedeelegung, oder a Schallmoossungen éier d’Wandmille gebaut gëtt a Moossungen duerno. Eng „mesure préventive“ ka jo net sinn, eng Wandmillen ze bauen an da Schallpeegelen ze vergläiche mat Wäerter ouni Wandmillen!!

Weider am Text: „L’implantation d’éoliennes à des distances trop proches de logements peut avoir un caractère trop anxiogène, pouvant impacter la qualitéde vie des riverains…une procédure participative…prenant en compte l’opinion et les craintes des riverains, devrait permettre de trouver des solutions satisfaisant pour les parties concernées…avant que des procedures d’autorisation concrètes ne soient entamés.”

Hei gëtt d’Madamm Lenert jo selwer zou, datt Soler hätt missen am Virfeld mat de Bierger zesumme schaffen an op d’Ängschte vun de Leit agoen. Dat ass jo manifest net geschitt! Genau de Contraire ass den Historique vun eiser Wandmillen. Fir d’éischt ginn Neel mat Käpp gemaach: kucken datt all d’Autorisatiounen a Problemer am „grénge“  Beräich leien, éier een dann de Bierger informéiert wat ee virhuet!! Ënnert  „procédure participative“ versti mir eppes Aneres! Mir si quasi viru „faits accomplis” gesat ginn!

E puer Zeile weider: „L’amélioration de l’acceptation de projets générant de l’énergie renouvable sera …de préserver l’environnement et d’améliorer la qualité de l’air  et la santé.”

Hei behaapt d’Madamm Lenert quasi an engem Saz, datt ee mat enger Wandmillen d’Gesondheet verbessert. Dat ass jo kontradiktoresch zu deem, wat se e puer Zeile mi fréi geschriwwen huet, wou se seet, vu datt bis dato keng Laangzäitstudien zu den „effets sanitaires“ existéieren an déi Etuden déi do sinn, net „suffisemment important“  sinn, een awer de „principe de précaution“ misst uwenden. Dat ass jo awer zimmlech weit wech vu „l’énergie renouvable permettra d‘améliorer la santé“!!

Am leschten Abschnitt steet geschriwwen:  „[…] je ne suis en mesure  de donner suite à votre demande de réalisation d’une étude d’impact du bruit et des infrasons d’autant plus que la Direction de la Santé ne dispose ni des équipements ni du personnel afin de réaliser une telle étude.“

Do kann een sech jo nëmme verwonnert d’Ae reiwen: Eis Ministèrë ginn d’Erlabnis fir zeg Wandmillen ze bauen, sinn awer net an der Lag adequat (also wat Biologen a Medezinner schonns méi laang fuerderen) Infraschallmoossungen  duerch ze féieren oder féieren ze loossen. Een Thema wéi „effets sanitaires“  vu Wandmille misst op der ieweschter Prioritéitelëscht vun engem Gesondheetsministère stoen.

D’Gesondheet ass an eisen Aen net verhandelbar.

vum Roger Infalt

Klickt de Banner hei uewen un, fir den Artikel ze liesen!

© 2021 Tageblatt – Tous droits réservés – Des licences d’utilisation de droits d’auteur peuvent être obtenues à travers www.luxorr.lu

Den 22. Abrëll 2021 hate mir eis PR-Aktioun „Wiederballon“ fir d’Bierdener Leit an d’Awunner vun der Nordstad op déi gigantesch Héischt vun 230 Meter vun der geplangter Wandmillen opmierksam ze maachen.

Och wann d’Wiederkonditiounen et leider net erméiglecht hunn, de Ballon op déi uviséiert Héischt ze bréngen, sou war eis Aktioun awer e groussen Erfolleg, well mir niewent RTL och Nordliicht-TV fir eng Reportage beweege konnten.

Virun allem Nordliicht-TV huet sech ganz vill Zäit geholl fir all eis Suergen a Bedenken adequat an hirer Reportage erëmzeginn. Dofir wollte mir op dëser Plaz nach eng Kéier e grousse Merci ausschwätzen!

Hei kennt Dir de Video kucken:

Soler huet eis mat dëser Aktioun ënnerschwelleg virgeworf, mir géinge gär e neie Moment – nämlech dee vun der Ästhetik – an d’Spill bréngen, andeems mir eis lo gezielt mat der Héischt vun der Anlag ausenanersetzen.

Dat ass awer net eis Intentioun!

Mir plädéiere jo fir eng 10H-Reegel (also Distanz zur nächster Uertschaft soll 10x d’Héischt vun der Anlag bedroen), dat géing an eisem Fall zu Bierden zu enger Distanz vun 2,3 km féieren, an net zu nëmmen 750 Meter, sou wéi et lo geplangt ass.

Eis Aktioun sollt visualiséieren, wat fir en inacceptabelt Verhältnis tëschent Héischt vun dem Wandrad an der Distanz zu Bierden besteet!

Ausserdeem huet d’Gréisst vun enger Anlag och en direkten Impakt op Infraschallemissiounen an de Schattenwurf. Och dat wollte mir visualiséieren, well vill Leit sech net vill ënnert enger theoretescher Héischt vun 230 Meter virstelle kennen.

230 Meter sinn nämlech extrem héisch, wéi een hei ka gesinn:

An do stellt sech awer wierklech d’Fro, op déi verschidde vu Soler publizéiert Visualiséierunge vun der Wandmillen aus Bierdener Siicht souwéi hir  Schattenwurfberechnunge, déi kee Schied op Bierdener Häiser viraussoen, stemmen…

Den 19. Abrëll hu mir e Panneau viru Bierden opgeriicht, fir op eis Lutte géint déi geplangte Wandmillen opmierksam ze maachen.

Mir erhoffen eis mat dëser Initiativ, sou vill wéi méiglech Automobilisten aus der Regioun fir eis Bedenken ze sensibiliséieren an eisen Internetsite doduerch ze promouvéieren.

Bis ewell krute mir just ganz positiv Réckmeldungen an och eise Site huet kräfteg u Visiteuren zougeluecht.

Mir haten eng Entrevue mat dem Martine Hansen, Fraktiounspresidentin vun der CSV, fir mat hir iwwer eis Bedenken bezüglech der geplangter Wandmillen ze schwätzen. D’Madamm Hansen hat en oppent Ouer fir eis Suergen an huet doropshin eng Question parlementaire gestallt.
Lo läit eis d’Äntwert vun der Madamm Dieschbourg an dem Här Turmes vir an dozou wollte mir e puer Remarquen formuléieren:

1. Upasse vu Grenzwäerter un déi nei Generatioun vu Wandmillen

Hei heescht et an der Äntwert:
Deen an der Noperschaft zoulässegen Ëmweltimpakt gëtt net duerch eng spezifesch Anlag bestëmmt mee duerch de Charakter vun dem betraffene Gebitt.

Wéi soll dat gemengt sinn? Iwwerspëtzt kënnt een dee Saz der Verständlechkeet halber jo och sou ëmformuléieren:
Deen an der Noperschaft zoulässegen Ëmweltimpakt vun engem Supergau gëtt net duerch d‘Atomkraaftwierk bestëmmt mee duerch de Charakter vun dem betraffene Gebitt.

Déi Formuléierung entzitt sech eisem Verständnis, wat schued ass, well mir jo nach ëmmer op eng konkret Äntwert waarden wat d’Aktualiséierung vun der aler DIN-Norm ugeet. Eise Kritikpunkt ass jo genau deen, datt di al Normen just een Deel vum Frequenzberäich ënnersichen, dee wichtegen Spektrum 1 Hz bis 20 Hz gëtt net gemooss!

2. Grenzwäerter fir den Infraschall

Zitat Madamm Dieschbourg:
Aktuell gëtt et keng geséchert Erkenntnisser zum Infraschall bäi Wandmillen, déi géifen spezifesch Grenzwäerter justifiéieren.

Et ginn also keng geséchert Erkenntnisser. Dat heescht awer och, dass een sech net sécher ass, wéi schiedlech den Infraschall ka sinn. Mir froen eis dann awer, wéi een eng Anlag autoriséieren kann, wann een net weess, wat fir Auswierkungen et op déi ugrenzend Awunner wäert hunn. Dat ass e Risk, dee wuel bekannt ass, deen awer net ageschat ka ginn an deemno MUSS de principe de précaution eiser Usiicht no applizéiert ginn! Wat am Kloertext heescht, dass all Autorisatioun vun esou enger Wandanlag a Proximitéit zu den Urainer misst verworf ginn – bis eben geséchert wëssenschaftlech Erkenntnisser virleien! Schonns 2007 huet den Robert Koch Institut bemängelt, datt et net genuch ëmweltmedizinisch Ënnersichungen zu Infraschall géif ginn an dat bei Anlagen, déi weit méi kleng waren, wéi déi vun haut!

3. Zréckstellen vun der Autorisatioun

Ausféierung vun der Madamm Ëmweltministesch:
D’Kommodo-Gesetzgeebung gesäit een Zréckstellen vu lafenden Dossieren net vir.

D’Madamm Hansen hat awer nom Zréckstellen vun der Autorisatioun gefrot, déi bekanntlech um Ënn vun der Kommodo-Prozedur steet an den Ofschloss vum lafenden Dossier duerstellt. D’Ausstellen vun der Autorisatioun ass awer net u gesetzlech, zäitlech Delaien gebonnen. D‘Madamm Dieschbourg kennt also schonns hir Responsabilitéit huelen a mat der Ënnerschrëft waarden bis nei Erkenntnisser virleien. Viraussetzung dofir ass awer, datt een dat wëllt …
A wann een dozou bereet ass, da kéint een dat de besuergte Bierger jo awer och sou matdeelen?

Déi detailléiert Äntwert kënnt dir hei liesen:

Den 10.02.2021 huet den Deputéierten Här André Bauler (DP) e puer Froen un d’Ëmweltministesch Carole Dieschbourg bezüglech dem héierbare Kaméidi souwéi dem Infraschall vu moderne Wandanlage gestallt, well jo ganz aktuell zu Echauffour (Orne) a Frankräich en Urteel zu Gonschte vun de betraffene Bierger gesprach gouf.

Allerdéngs kënne mir als betraffe Leit, vun deenen d’Madamm Dieschbourg jo schwätzt, guer keng verwäertbar Informatiounen aus hirer Äntwert zéien. Et heescht, aktuell Studien an nei wëssenschaftlech Erkenntnisser géife “suivéiert”.

Wat soll dat heeschen: suivéiert?

Momentan gëtt all Wandanlag vum Ëmweltministère geneemegt, wann déi al Normen erfëllt sinn, do hëlleft e parallelt Suivéiere vun aktuellen Erkenntnisser wéineg, wann d’Autorisatioun bis gesprach ass, an d’Camione mat de 70 m laange Rotoren urullen!

Dat sinn zwar schéi Wieder, mee ënnert dem Stréch just eidel Worthülsen, mat deene mir betraffe Bierger beim beschte Wëllen näischt ufänke kennen.

An och d’Argument mir kéinten eis jo um finanzielle Profit vu sou enger Anlag bedeelege weist, datt eist Uleies – nämlech eis gesondheetlech Bedenken eescht ze huelen –  hei mat materielle Virdeeler an een Dëppe geworf gëtt. D’Gesondheet ass awer net mat Suen ze kompenséieren, dat misst sech eigentlech vum selwe verstoen …

En anere Punkt sinn ëmmer erëm ugeschwaten neutral Etüden, déi am Kommodo gemaach ginn, fir vu Fall zu Fall, ganz op de jeeweilege Standuert bezunn individualiséiert, moossgeschneidert Léisungen zum Wuel vun den Urainer, der Natur an der Ëmwelt ze fannen. Och dat héiert sech an der Theorie immens récksiichtsvoll un, mee et ass awer och en Argument fir vun engem genormten Ofstand zu bewunnte Gebitter, wéi en a ville Länner mëttlerweil aus guddem Grond ugewannt gëtt, ofzelenken.

A schlussendlech muss festgestallt ginn, dass an der Praxis dann awer trotz neutralen un d’Lokalitéit ugepassten Etüden de Schied vun der Wandmillen (wéi z.B. op der Houschter Déckt) duerch de Leit hir Stuff zitt. Eng konkret Äntwert ass d’Madamm Minister dem Här Bauler och an dëser Fro schëlleg bliwwen…

Den 1. Februar 2021 huet den Här Paul Heinen, op eis Initiativ hin, eng ganz interessant Konferenz op der Ierpeldenger Gemeng a Präsens vum ganze Schäffen- a Gemengerot gehalen. A sengem Virtrag goung et virun allem ëm d‘Verhältnes vun Opwand an Notzen, ëm positiv an negativ Aspekter vun der Energiewend hei zu Lëtzebuerg. Aus deene ville Fakten, Berechnungen an Etüden, virun allem vum Frauenhoferinstitut, erginn sech eng ganz Rei Froen a Feststellungen:

1) De Bäitrag vu 5 Promill zum Endenergieverbrauch (bei momentan ronn 75 Wandmillen) steet an engem anere Liicht wéi d‘Aussoen, eng Wandmille géif Dausenden Haushalte permanent Stroum liwweren.

2) Firwat gëtt dem Bierger verheemlecht, datt beim Ausbau vu volatillen Energiequellen duebel Kraaftwierksstrukture gebraucht ginn an datt dëst een héije Flächen- a Ressourcëverbrauch a massiv Käschten erfuerdert.

 3) Firwat suggeréiert d‘Politik , Wand- a Solarstroum kéinte bis 2050 permanent zu 100% konstante Stroum liwweren, wann ee weess datt déi permanent verfügbar Leeschtung momentan ëm 1%  vun der installéierter Leeschtung leit. Et gëtt keng geséchert Leeschtung mat volatillen Energiequellen.

 4) Vu datt et keng saisonal Späicher fir de volatille Stroum gëtt, muss den Iwwerschoss ënnert dem Präis verkaaf ginn, an zu aneren Zäiten deier am Ausland akaaf ginn.

 5) Firwat seet eis d‘Politik net, datt all weideren Ausbau vu Wandmillen oder Solaranlagen zu méi Export féiere muss, a mir also duebel ofhängeg si mat bëllegen Exporter an deieren Importer.

 6) Firwat dat Argument, „de Wand bléist ëmmer iergendwou an Europa“ wann et gewosst ass, datt Europa vu groussen Drockgebidder bestëmmt gëtt; entweder et ass ze vill Loft, oder ze mann!

 7) Firwat gëtt vun der Politik op d‘Speicherléisungen  (Pompspäicherwierker, Batterien,
Gas) gesat, ouni de Leit ze soen, datt ee bei enger 100% Stroumwend zu Lëtzebuerg 200 mol Veianen bräicht, oder z.B.: 20 Milliounen Elektroautoen oder 300 Kugelgastanken. Wéi steet hei mam Flächeverbrauch, mat dem Rohstoffverbrauch an dem finanziellen Opwand?

 8) Firwat gëtt de Leit net erkläert, wat déi ekonomesch a sozial Aspekter vun enger 100% Energiewend am Kloertext bedeiten:

 Bei engem Energieverbrauch, dee bis 2050 géif stagnéieren (50 TWH) bräichte mir 19 000 Wandmillen, oder 700 km² Fotovoltaikfläch oder 21.000 km² Biogasfläch fir 100% gréng Energie ze produzéieren. Datt de Materialverbrauch an d‘Milliounen Tonne geet, datt d‘Investitionskäschte bei Honnerte Milliarde leien an den Ëmweltimpakt beträchtlech wier kann ee jo wierklech net als realistesch a gelongen Energiepolitik bewäerten an  datt dann de Stroumpräis bei esou enger Energiewend zu den deierste vun der Welt gehéiere muss, kann ee jo um Beispill Däitschland feststellen.

 Nach e puer Fakte fir d‘Gréissenuerdnungen an dat richtegt Liicht ze réckelen:

 Fir déi Energiewend 2050 mat engem Mix vu 50% Wand, 30% Solar an 20% Biomass hin ze kréien, bräicht ee pi mol Daumen:

* 10.000 Wandmille vun 3MW an
* 500 km² fräi Fläche fir Fotovoltaik an
* 4000 km² Akerland

 No dem Virtrag vum Här Heinen konnt een sech just nach d‘Fro stellen:
Wou geet esou eng Rees hin?

D’Verhältnis Opwand an Notze war op jidder Fall klor ze beäntwerten!