Den 03.12.2020 haten mir eng Entrevue mam Ierpeldenger Schäfferot fir iwwert den aktuelle Stand vum Projet Wandmillen ze schwätzen.
Den Här Buergermeeschter Claude Gleis huet eis, wéi och schonns wärend der Kommodo-Prozedur, de Support vun de Gemengeverantwortlechen versprach fir d’Implantatioun vun der Wandmillen zu Bierden ze verhënneren.
Den Här Gleis huet eis nach eng Kéier verséchert, dass d’Gemeng Ierpeldeng keng Wandmillen a Proximitéit vun der Uertschaft Bierden wëll. Dës Problematik soll am nächsten Gemengerot zur Sprooch bruecht ginn.
Sollt de Projet net vun der Gemeng Ettelbréck verworf ginn, hätt de Gemengerot d’Méiglechkeet d’Fusioun ze blockéieren andeems zu Ierpeldeng kee Referendum fir d‘ Fusioun géing organiséiert ginn. Domat wär d’Nordstadfusioun dann net méi méiglech …
Eist Gespréich war ganz positiv a mir zielen weiderhin op d’Ënnerstëtzung vun eisem Gemengerot a Buergermeeschter!
De 15.10.2020 hu Vertrieder vun eiser Initiativ um Biergerforum Fusioun Nordstad am Centre culturel zu Ierpeldeng/Sauer deel geholl.
Mir hunn op dëser Veranstaltung ganz kloer zum Ausdrock bruecht, dass de Projet vun enger Wandmillen zu Bierden en onnéidege Käil an d’Nordstadsverhandlungen dreift. Et entsteet den Androck, dass déi grouss Gemengen Ettelbréck an Dikrech iwwert d’Käpp vun de klenge Gemengen ewech einfach probéiere Projeten duerchzeboxen. Dat ass am Virfeld vun engem Referendum eng ganz fragwürdeg Virgoensweis, déi mir net novollzéie kënnen. D’Gemeng Ierpeldeng gouf méi oder wéineger virun e Fait Accompli gestallt an d’Bierdener Leit am leschte Moment iwwert de Projet informéiert.
Wann dat lo schonns virun enger Fusioun Usus sollt sinn, wéi leeft et dann eréicht, wann d’Fusioun vollzunn ass? Sinn déi kleng Gemengen da just nach de Spillball vun Dikrech an Ettelbréck? Den Androck entsteet jiddefalls hisiichtlech dem Wandmillen-Projet zu Bierden!
Fir et ganz kloer ze soen: Kee vun eis ass géint d’Nordstad, ganz am Géigendeel, mir fannen et e ganz wichtege Projet a prinzipiell ënnerstëtze mir d’Fusiounsbestriewungen. Mä mir plädéieren fir eng Gläichberechtegung vun alle 5 involvéierte Gemengen!
Mir konnten awer och wärend dem Biergerforum am Dialog mat villen, net direkt vun der Wandmille concernéierten Awunner vun der Gemeng Ierpeldeng feststellen, dass och si hannert eis stinn, eis Bedenken an Ängscht verstinn, eis Initiativen ënnerstëtzen an d’Virgoe vun de Gemengen Ettelbréck an Dikrech verurteelen. Dat huet eis nohalteg an eisem Bestriewe gestäerkt, weider géint de Projet virzegoen!
Och interessant: Vum Organisatiouns Team ass am Ufank an zum Schluss vun der Veranstaltung eng Online Ëmfro gemaach ginn, fir z’ermëttelen, wéivill Participanten fir eng Fusioun wären. Dobäi koum raus, dass no eiser Interventioun am Laf vum Forum, zum Schluss manner Leit dofir waren.
Déi 2 Deputéiert André Bauler a Gusty Graas (DP) hunn an enger Parlamentarescher Fro (n°2590) vum 27.07.2020 am Zesummenhang mat der geplangter Wandmillen zu Bierden folgend Fro un den Energieminister Turmes an d’Ëmweltministesch Dieschbourg gestallt:
“Sinn den Här an d’Madame Minister bereet fir den Dialog mat de Bierdener an Ierpeldenger Bierger opzehuelen an eng Rei Froe mat hinnen am Kader vun enger weiderer Informatiounsversammlung ze klären, fir datt Ängschten a Suerge vun der Bevëlkerung am direkte Gespréich kënnen ugesprach ginn? Wa jo, wier dat am spéide Summer oder am fréien Hierscht méiglech?“
D’Hoffnung vun de Bierger am direkten a virun allem perséinlechen Dialog iwwert déi herrschend Bedenken an Ängscht mat eise gewielten Volleksvertrieder schwätzen ze kënnen, gouf awer leider net erfëllt. An der Äntwert vu béide Ministeren heescht et den 22.09.2020 schliisslech:
„Den Dossier de Demande wor, wéinst engem Formfeeler vun der Gemeng bei der éischter Kéier, nach eng Kéier an d’Enquête publique (Commodo-Gesetz) gaangen. Dat heescht, d’Bierger hate nach eemol d’Méiglechkeet, sech an d’Detailer vun der Demande anzeliesen an hier Observatiounen ofzeginn. Selbstverständlech bleiwen awer d’Observatiounen, déi am Kader vun der éischter Enquête publique gemaach goufe, weiderhi valabel. Déi Observatioune ginn all considéréiert iert eng Commodo-Décisioun geholl gëtt.“
Mir bedaueren an dem Kontext, dass d’Ministeren net op déi gestallte Fro geäntwert hunn, mä sech mat der Excuse erausrieden, d‘Bierger hätte jo hir Bedenken schrëftlech rareeche kënnen. Den Här Bauler an den Här Graas haten awer ganz kloer no engem Dialog gefrot, an dee baséiert par Definitioun op d‘Stellen an d‘Äntwerten op Froen. D’Responsabilitéit fir Stellung ze huelen, ass dowéinst bedauerlecherweis keng Optioun fir eis Ministeren gewiescht.
Mir géingen eis wierklech wënschen, dass hei en Ëmdenken an den zoustännege Ministère stattfënnt.
Onperséinlech formal Prozeduren sinn eng Saach, de perséinleche Kontakt mat de Bierger eng aner!
Wärend dem Conseil Communal vun der Gemeng Ettelbréck, de 14. September 2020 huet den Här Schaaf e kuerzen Historique zu de geplangten Siten vun deenen 2 Wandmillen an der Nordstadregioun ginn.
An enger éischter Phase gouf Soler SA beoptraagt, déi bescht Emplacementer fir 2 Wandmillen auszemaachen. Hir Etüd huet doropshinn 2 Siten als déi gëeegenst – well am effektivsten – zréckbehalen.
De Karelshaff op Ettelbrécker Terrain
Den Härebierg op Dikrecher Terrain
De Site beim Härebierg ass awer ganz séier fale gelooss ginn, an dat aus folgenden Argumenter:
D’Arméi trainéiert hei mat High-Tech-Dronen an an dem Kontext ass et ze riskant eng Wandmillen als méiglecht Hindernis am Ëmfeld ze hunn.
Eng Wandmillen stéiert de Militärhelikopter, deen och um Härebierg am Asaz ass.
Well de Site beim Härebierg net méi a Fro koum, huet Nordenergie SA dunn zesummen mat Soler SA gekuckt, fir en aneren Site ze fannen, wouropshin Bierden an d’Spill koum.
Mir stellen also fest, dass de Bierdener Site eng Noutléisung ass, well sech d’Wandmillen net um Härebierg realiséiere gelooss huet. Mir stellen och fest, dass den Ertrag vun der Wandmillen zu Bierden also manner effektiv ass am Verglach zu enger Anlag um Härebierg.
Wat mir guer net novollzéie kënnen, ass dann d’Argumentatioun, firwat de Site um Härebierg fale gelooss ginn ass. Fänke mer mol mam 1. Argument un:
Droneproblematik
All Hobbypilot ka seng Dron laanscht eng Wandmillen steieren, et kann also net sinn, datt Experten, déi fir e multifunktionalen Asaz a Krisen- a souguer Krichsregiounen ausgebilt ginn, hei en novollzéibare Problem kënnen hunn.
Am Entretien vu Wandmillen gi souguer gezielt Dronen zur Inspektioun vun de Rotorblieder agesat!
Dobäi kënnt, dass de Site vun der Wandmillen mol net direkt um Härebierg wier, wat en Impakt bei Start- a Landeprozeduren ausschléisst. De reguläre Betrib vun enger Militärdron fënnt ausserdeem op enger Héischt vun 10-15 km statt, d’Wandmillen ass 230 m héich…
Hei handelt sech also ëm en Argument, wat méi wéi mat den Hoer erbäi gezunn ass!
2. De Militärhelikopter
Dat 2. Argument fir de Site um Härebierg falen ze loossen, war laut Nordenergie SA dat vum Militärhelikopter, deen do sporadesch am Asaz ass. Dat ass en Argument, dat mir duerchaus novollzéie kënnen, well en Helikopter jo net sou héich flitt an eng Wandmillen, jee no Wiederconditiounen geféierlech ka ginn.
An deem Zesummenhang muss awer och festgehale ginn, datt den Helikopter vun der Air Rescue all Dag e puer Mol – also vill méi oft wéi de Militärhelikopter um Härebierg – iwwer Bierden flitt, an dat virun allem iwwert den diskutéierten Emplacement vun der Wandmillen fir bei der Klinik St. Louis zu Ettelbréck ze landen. Am Géigesaz zu der Arméi huet d‘Air Rescue awer guer kee Problem domat, laanscht eng méiglech Wandmillen ze fléien!
Wéi kann et also sinn, dass d’Air Rescue mat enger potentieller Wandmillen matten an hirer Afluchschneis eens gëtt, an d’Arméi – déi wéi gesot eigentlech fir ganz aner Zenarien ausgebilt ass – hei anscheinend kapituléieren muss?
Dofir ass fir eis och an dësem Fall kloer, hei handelt sech ëm e Scheinargument vun Dikrecher Säit fir en eigentlech gëeegente Site op hirem Terrain falen ze loossen.
Mir fuerderen dofir, dass de Site um Härebierg, oder en aanere Site an der Gemeng Dikrech, nees an d’Diskussioun mat abezu gëtt a sech och d’Gemeng Dikrech domat bereet erklärt hire Bäitrag zum diskutéierten Energiekonzept ze leeschten.
Als Member vun der Nordenergie SA kasséieren, mee dat op kee Fall mat enger Wandmillen op dem Dikrecher Terrain, dat ass keng fair Optioun, Här Buergermeeschter Haagen – net vis-à-vis vun Äre soi-disant Partnergemengen Ettelbréck an Ierpeldeng a schonns guer net vis-à-vis vun de gesondheetleche Bedenken vun de Bierdener Leit!
Den Ettelbrécker Buergermeeschter huet selwer wärend der Informatiounsversammlung mat Soler SA den 9. Juli 2020 an der Däichhal zouginn, dass d’Konstruktioun vun der bis dato gréisster Wandmillen hei am Land zu der bis dato kierzter Distanz zu enger Uertschaft eng „Zoumuddung“ fir d’Awunner vu Bierden duerstellt.
Dofir froe mir eis, firwat den Här Schaaf bis elo net d’Reißleine gezunn an de Projet definitiv verworf huet. Et ënnerläit ëmmerhin senger Responsabilitéit den OK fir d’Wandmillen, déi op Ettelbrécker Terrain soll stoe kommenn, ze ginn.
Mir hoffen dowéinst weiderhin op de gesonde Mënscheverstand vum Ettelbrécker Buergermeeschter fir ee fir allemol dee Projet definitiv falen ze loossen !
