Mir hu wärend eise Präsentatiounen a Präsenz vun der Madame Kater vun RTL nach emol probéiert d’ interesséiert Leit aus der Gemeng op eis Kritikpunkten a Bedenken opmierksam ze maachen.
Well een hei um Internetsite alles am Detail noliese kann, gi mer an dësem Artikel just stéchwuertaarteg op d’Kärelementer vun eise Virträg an.

a) Eis gesondheetlech Bedenken

• Den héierbare Kaméidi wäert an eisem rouege ländleche Milieu zur Dauerbelaaschtung ginn; op d’Grenzwäerter agehale kënne ginn, bezweifele mir
• D’Auswierkunge vum produzéierten Infraschall op eisen Organismus op déi kuerz Distanz si méi wéi ongewëss; et gi keng zouverlässeg Laangzäitstudien, déi den Impakt vu moderne Wandmillen op eise Kierper dokumentéieren; mir fuerderen dowéinst d’Anhale vum Principe de précaution fir d’Gesondheet vun de Bierger sécher ze stellen
• De Schattenwurf an den domat verbonnenen stroboskopeschen Effekt (hell-donkel) wäert zu enger weiderer psychescher Belaaschtung féieren; an der Theorie si bis bal 2 Méint Schattenwurf zu Bierden méiglech; betraff ass quasi 50 % vum Duerf; och am ale Bierden ass mat massivem Schattenwurf ze rechnen

  Fazit: Déi opgezielte Faktore kënne laut medezinesche Studien de sougenannte Syndrome éolien bei 10-30% vun de betraffene Bierger ausléisen, dee sech a Form vu Kappwéi, Schlofstéierungen, Häerzrhythmusstéierungen, Schwindel, Middegkeet, Onrou asw. manifestéiert.
  Musse mir dee Risiko wierklech agoen?

b) De Volet Ëmweltschutz

• Eis Kritik: De Ministère de l‘environnement huet d’Warnunge vun der Ëmwelt-Etude ignoréiert an d’Schwäche vun der Etude akzeptéiert fir de Projet Wandmillen duerchzewénken!
• Mir hunn eis Behaaptung dunn un a puer konkrete Beispiller duergestallt;
  • Fliedermais: Hei waren d’Moossapparater wärend der Haaptsaison am August futti a konnte keng Donnéeë sammelen
  • Wëllkaz: Mir hunn den Irrsinn vum Korridor duergestallt a bewisen, dass sech d’Kaz och ausserhalb vum Korridor direkt niewent der geplangter Wandmillen ophält (heizou gëtt et och e Video op eisem youTube-Channel)
  • De Milan ass massiv präsent um Site;  mir hunn op eise Monitoring higewisen (och bei eis um youTube-Kanal)
  • Deziméiere vun der Feldlerche, déi och op der rouder Lëscht vun de bedroten Aarte steet, gëtt a Kaf geholl
  • De Mortalitéitsrisiko vum Uhu (Grand-Duc) gëtt bagatelliséiert a rofgespillt
• Des Weideren hu mir erkläert, dass de Plateau zu Bierden tëschent Sauerdall engersäits a Warkdall anerersäits en ökologesch onberéierte Korridor duerstellt, deen op kee Fall och nach duerch eng Wandmille sequenzéiert däerf ginn.

c) Eis juristesch Demarchen

• Déi verschidde juristesch Schrëtt, déi mir bis lo duerchlaaf hunn an déi och nach an Zukunft ustinn, goufen den interesséierte Leit am Sall duergestallt.

d) De politeschen Dossier

• Mir hunn e Resumé vun dem ganze politeschen Hin- an Hir zënter dem Ufank vum Projet gemaach; och dat kann hei um Site alles am Detail nogelies ginn …
• Ofschléissend hu mir eis Fuerderungen un d’Politik gestallt:
  • De Projet viru Bierden falen ze loossen
  • Den alternative Site, deen eis Gemeng virgeschloen huet, wär noutfalls zréckzebehalen
  • De Principe de Précaution am Sënn vu Bierger an Ëmwelt ze applizéieren
  • D’Suerge vun de Bierger eescht ze huelen
  • Eis Gemeng, déi jo d’Filetsstéck vun der Nordstad ass an eis bis elo ënnerstëtzt huet, muss sech mat vill méi Nodrock vis-à-vis vun Dikrich an Ettelbréck asetzen
  • D’Fusiounsgespréicher musse gestoppt ginn, bis d’WKA zu Bierden definitiv vum Dësch ass
    

Hei de Link zur Reportage op RTL

Mir hunn haut an der Gemeng Ierpeldeng eng Flyer-Aktioun gestart fir op eis Info-Versammlung den 12. Februar zu Bierden an „A Maesch“ opmierksam ze maachen.

Den Ierpeldenger Buergermeeschter Claude Gleis huet op eiser leschter AG op en Neits Verständnis fir eis Bedenke geäussert an och dorop higewisen, dass hien alles anescht wéi frou mam Site vun der Wandmille viru Bierden ass.

 Säi politescht Ziel wär et awer onbedéngt d’Nordstadfusioun  weider ze verfollegen an déi géif hien net wéinst der Wandmillen op d’Spill setzen. Géif hie mat méi Nodrock bei senge Kolleege vun Ettelbréck an Dikrech am Dossier Wandmillen intervenéieren, da géif dat eventuell dozou féieren, dass d‘Fusioun net zustane kéim a mir trotzdeem duerno eng Wandmillen do stoen hätten. Dat wär dann en zweefachen Echec, deen hien als Buergermeeschter net riskéiere wéilt.

Déi Approche kënne mir net novollzéien! Ëmmerhin huet eng ganz Uertschaft aus der Gemeng Ierpeldeng  – nämlech Bierden – mat iwwer 93 % vun de Stéit  géint de Projet vun der Wandmille schwaarz op wäiss ënnerschriwwen!

 Et ass politesch onverantwortlech, dass d’Meenung vu quasi engem ganzen Duerf d’Bauerenopfer fir eng eventuell Nordstadfusioun soll sinn. Et ass eiser Meenung no d’Pflicht vum gewielte Buergermeeschter dës Ënnerschrëften eescht ze huelen a mat vill méi Vehemenz géigeniwwer den Nopeschgemengen opzetrieden.

Dem Här Gleis seng Argumentatioun „de-responsabiliséiert“ iwweregens d‘Buergermeeschtere vun Ettelbréck an Dikrech. Andeems hien nämlech Zréckzéie vum Projet net als Viraussetzung fir weider Fusiounsverhandlungen fuerdert, mussen sech d’Häre Steichen a Weiler guer net méi der Entscheedung tëschent dem Projet Wandmillen engersäits  an der Nordstadfusioun anerersäits stellen. Si mussen sech net mol méi Gedanken ëm e méigleche Kompromëss am Dossier maachen. Déi Decisioun hëlt hinnen eise Buergermeeschter frëndlecherweis schonns am Virfeld ewech – an dat aus Befierchtung de perséinlechen Häerzenswonsch Nordstad kënnt scheiteren.

En plus legitiméiert eise Buergermeeschter seng Haltung duerch d‘Spekulatioun, et géife souwisou zum jëtzegen Zäitpunkt guer net méi esou vill Bierdener géint de Projet ënnerschreiwen. Eise Buergermeeschter formuléiert also eng Hypothees fir säi phlegmatescht Optrieden ze rechtfertegen an sech och selwer aus der Responsabilitéit eraus ze zéien. 

Et kann awer net sinn, dass eng reell existéierend Ënnerschrëftelëscht ignoréiert gëtt, fir dann anerersäits eng reng subjektiv Behaaptung als Legitimatiounsgrondlag fir dat eegent politescht Handelen ze formuléieren! 

Taktik vun der beschriwwener allgemenger Verwässerung vu politescher Responsabilitéit gëtt eiser Meenung no an dësem Dossier op d’Spëtzt gedriwwen. Déi leittragend sinn zum Schluss d’Bierdener Bierger, déi eleng d’Panoplie vun de Nuisancen droen däerfe, wärend sech wäit ewech zu Dikrech an Ettelbréck d’Keess ouni weider negativ Auswierkungen op déi eege Bierger bequeem fëllt.

 Mir fuerderen dofir weiderhi  vill méi politeschen Drock géigeniwwer eisen 2 groussen Nopeschgemengen. Eiser Usicht no kann een Thematik Wandmillen a Nordstadfusioun NET vuneneen trennen. De Wee zur Fusioun ass réischt da fräi, wann och d’Bedürfnisser a Suerge vun de kléngen Dierfer eescht geholl ginn. Soulaang dat net de Fall ass an den éierlechen Interessi an d‘Kompromëssbereetschaft vun de grousse Gemengen ausbleift, mécht d’Fusioun kee Sënn an hannerléisst just de battere Bäigeschmaach, dass si eleng bestëmmen, wéi et an Zukunft weiderleeft. Mir fuerderen dofir en Dialog op Aenhéicht ënnert gläichberechtegte Partner.

 D’Fusiounsgespréicher musse gestoppt gi bis den Dossier Wandmille vun eisen 2 groussen Noperen eescht geholl gëtt an sech z.B. seriö Gedanken ëm den alternative Site gemaach ginn, dee laut leschten Informatioune vu Soler duerchaus ze realiséiere wier.

 Wandkraaft jo – Nordstad jo – mee op kee Fall eleng op d’Käschte vun  eiser Gesondheet a Liewensqualitéit!

De 26. Juni 2024 hu mir eis 3. Assemblée générale an der Aler Schoul zu Bierden a Präsenz vun eisem Buergermeeschter Claude Gleis souwéi dem gesamte Schäffe- a Gemengerot ofgehal.

De bestoende Comité gouf an onverännerter Zesummesetzung a Funktioun fir e weidert Joer bestätegt.
Och de finanziellen Decompte vun eiser asbl gouf vun de Reviseuren approuvéiert.

Duerno huet eise Comité op en Neits op déi zentral Punkten higewisen, déi eis um Häerz leien.

a)  De politesche Volet
Eise Präsident Yves Wallers huet ganz kloer formuléiert, dass mir eis vun eiser Gemeng, an am spezielle vun eisem Buergermeeschter méi Engagement an Ënnerstëtzung wënschen. Eiser Meenung no, gëtt net genuch politeschen Drock op déi 2 grouss Nopeschgemengen Ettelbréck an Dikrech ausgeüübt fir vum Projet Wandmillen ofzeloossen. Nordstadfusioun a Wandmille sinn eben net vuneneen ze trennen, et geet an dësem Dossier och dorëm, wéi seriö d’Bedürfnisser an d‘Suerge vun de klengen Dierfer vun eise groussen Nopere geholl ginn. 

b)  Eis gesondheetlech Bedenken

– Infraschall: Mir riichten Wandrieder op, a mir hunn keng Laangzäitstudien, di beweisen, datt et keng effets sanitaires op de Mënsch gëtt. Well d’Regelwierk nit méi zäitgemäss ass fir di heiteg Megawandrieder an d’Moossprotokoller den déiwen Infraschall vun 0,1 bis 8 Hz nit berücksichtigen, sinn d’Aussoen vu Soler an der Politik iwwert d’Onbedenklechkeet einfach nit korrekt! Et gëtt an dem Kontext de medezinesch unerkannten Term vum „Syndrom éolien“ deen drop hiweist, datt 10 – 30% vun de Mënschen bei Laangzäitexpositioun mat Kappwéi, Schwindel, Schlofstéierungen, Häerzrhythmusstéierungen etc. reagéieren. Mir fuederen d’Anhale vum “Principe de précaution” aus Manktem un zouverlässegen Etuden an dat heescht konkret eng gréisser Distanz vun den Häiser zu der Wandmillen op Hasenbach. D’Agenda 21 vun UNO seet: „Le principe de précaution est applicable lorsque les certitudes scientifiques manquent ou sont insuffisantes pour prouver la relation de cause à l’effet et que, simultanément, de sérieux indices font craindre un risque important pour la santé de l’homme et des animaux ou pour l’environnement. En cas d’incertitude scientifique, il y a un droit, voire une obligation, de prendre des mesures préventives.”

 – Kaméidi: Mir wunnen hei zu Bierden an engem quasi geräischfräie Raum, keng Autobunn, keen Zuch, quasi null Verkéier owes an nuets. Dat ass ee vun den zentrale Grënn firwat vill Famillen an de leschte Joren op Bierden gezu sinn, a fir hire Choix vun engem rouegen Doheem fir sech an hir Kanner zum Deel héich finanziell Belaaschtungen a Kaf geholl hunn. Mat der geplangter Wandmillen ännert sech dës Situatioun. De psycheschen Impakt vun enger auditiver Dauerbelaaschtung ass net ze ënnerschätzen a wäert bei jonken an alen Awunner seng Spueren hannerloossen. Et ass an eisen An dofir falsch sech hannert engem theoretesche Richtwert vu 37 dB ze verstoppe fir d’Belaaschtung op de mënschlechen Organismus festzeleeën  ouni Berücksichtegung vun der bestoender Geräischkuliss virum Opriichte vun enger Wandmillen.

 – Schattenwurf: Mir hunn des Weideren dorop higewisen, dass de Schattenwurf net bei der éischter Rei Haiser ophéiert, mee dat ganzt Duerf betrëfft. Wien eisen Drone-Video gesinn huet kritt en Androck dovun, wéi gewalteg déi Konstruktioun wäert ginn, a wéi wäit de Schied deementspriechend fale wäert. An der Etude, déi Soler an Optrag ginn huet, geet een z.B. am Alen Duerf vu bis zu 55 Deeg Schattenwurf am Joer aus, dat si quasi bal 2 Méint! Den Impakt op d’Psyche vum Mënsch duerch de sougenannte stroboskopeschen Effekt ass eiser Meenung no net ze ënnerschätzen. Wien sech den Effekt net virstelle kann, kritt hei en Androck.

 Clôturéiert gouf eis Assemblée générale nom Virdroe vun eise gesondheetleche Bedenken a politesche Fuerderunge mat enger oppener Diskussioun.

Den 29. Mäerz 2023 huet den Ettelbrécker Buergermeeschter Jean-Paul Schaaf trotz dem offizielle Veto vun der Gemeng Ierpeldeng-Sauer souwéi lafende juristesche Prozeduren um Verwaltungsgeriicht d’Baugeneemegung fir d’Wandmille „Auf Hasenbach“ ënnerschriwwen.

Zesumme mat eise Gemengepäpp hu mir als Reaktioun op dës déplacéiert Demarche eng Pressekonferenz aberuff, fir op e Neits op eise Standpunkt an eis Bedenken hinzeweisen a Léisungsvirschléi am Sënn vun der Nordstadfusioun ze formuléieren.

Well Zeitungsartikelen a Reportagen aus Plaz- an Zäitgrënn net eis gesamt Argumentatioun an eist Uleies ofdecke kënnen, publizéiere mir lo op dëser Plaz d’ganz Pressekonferenz:

Eis offiziell Ënnerlagen vun der Pressekonferenz ; Resolutioun vun dem Gemengerot Ierpeldeng-Sauer

Reportage op RTL

Reportage op Nordliicht TV

Link zu eisem YouTube-Kanal

Dëst Joer huet eis Assemblée Générale den 28. Mäerz zu Bierden an der Aler Schoul stattfonnt.

Och wann et sech bei dëser Veranstaltung éischter ëm eng Formalitéit handelt, sou haten sech awer eng Rëtsch Leit afonnt fir iwwert de Bilan vun eisen Aktivitéiten informéiert ze ginn.

Sou war och quasi de kompletten Ierpeldenger Gemengerot present, fir op de neiste Stand vun eisen Demarchë gesat ze ginn.

Eise President Yves Wallers huet sech a senger excellenter Introduktioun kämpferesch ginn an nach eng Kéier betount, dass mir trotz der rezenter Autorisatioun vum Ëmweltministère weiderhin all Hiewel op politeschem a juristeschem Niveau a Beweegung setze wäerten, fir de Bau vun der Wandmillen op Hasenbach ze verhënneren.

Och den Ierpeldenger Buergermeeschter Claude Gleis huet d’Wuert ergraff an nach eng Kéier an aller Däitlechkeet betount, dass d’Gemeng Ierpeldeng-Sauer net mat dem Choix vum Site averstanen ass. Si géinge lo och hirersäits juristesch Demarchë préiwe loossen.

Eisen Aktivitéitsrapport, dee vum Michèle Garin-Stein präsentéiert gouf, fannt dir hei: Link

Wann dir eis weiderhin als Member ënnerstëtze wëllt, fannt dir hei all wieder Informatiounen: Link

Mir hu, mat eise bescheidene Mëttele, selwer e Milan-Monitoring zu Bierden am Summer 2022 duerchgefouert.
Mat engem Klick op d’Bild kommt Dir zum Artikel.

Et ass e Schrëtt, op dee mir eng Zäitchen hu misse waarden, mee lo ass der Gemeng hir Positioun offiziell.

Den 9. Mäerz 2022 huet de ganze Gemengerot unanime eng gemeinsam Resolutioun ënnerschriwwen a sech domat géint de Bau vun enger Wandmillen „Auf der Hasenbach“ ausgeschwat!

Mir begréissen dëse wichtege Schrëtt ausdrécklech a si frou, dass lo nom mëndleche Support och fier d’éischt e schrëftlecht Dokument virläit, dat d’Argumenter vun eisem Gemengerot zesummefaasst an eise Fuerderungen domat de Réck stäipt.

D’Gemengepäpp hate jo schonns viru Méint als Kompromëss den alternative Site „Um Leezefeld“ op eegenem Gemengenterrain virgeschloen, deen am Moment och intensiv vu der méiglecher Bedreiwer-Firma Soler op d‘ Machbarkeet analyséiert gëtt.

D’Gemeng Ierpeldeng wëllt also ganz kloer hir Verantwortung am Kader vun der nationaler Energiepolitik droen, mee dat awer zesumme mat alle Nordstad-Gemengen op Basis vun engem gemeinsame Konzept, vun deem all d‘Bierger aus der Nordstad profitéiere kënnen a keng Gemeng benodeelegt gëtt.

An dësem Kontext dréckt de Gemengerot och de Wonsch no engem verstäerkten Ausbau vu Photovoltaik-Anlagen an der Nordstad aus.

D’ Resolutioun, déi un den Ëmweltministère, de Ministère fir Energie a Landesplanung  souwéi déi 4 Nordstadgemenge verschéckt gouf, fannt Dir hei:

Resolutioun Gemeng Ierpeldeng

——————————————————————————————————————————-

Den Här Roger Infalt vum Tageblatt huet den 04. März 2022 e gudden Artikel zur aktueller Situatioun geschriwwen.
Dir kënnt den Artikel liesen, andeems Dir op den Auszoch hei klickt: 

© 2022 Tageblatt – Tous droits réservés – Des licences d’utilisation de droits d’auteur peuvent être obtenues à travers www.luxorr.lu

© energiematverstand.lu

Mir hunn eis 1. Generalversammlung, den 2. Mäerz 2022 am Centre culturel ‚A Maesch‘ zu Bierden, ofgehal.

Eise Vizepresident, Georges Pott, – de President Yves Wallers woer wéinst ‚Corona‘ forcéiert doheem ze bleiwen – huet séch a senger Usprooch erfreet gesot, datt de ganze Gemengen- a Schäfferot – ausser dem Buergermeeschter Claude Gleis, dee leider ‚Corona‘ bedéngt net konnt derbäi sinn – präsent wär an domat hiert Interessi un eiser Biergerinitiativ beweise géngen.

De gutt gefëllten Aktivitéits Rapport, mëndlech präsentéiert vun eiser Sekretärin, Michèle Garin, an zugläich op de groussen Ecran projezéiert, gouf mat Applaus appreciért.

D‘ Detailler vum Tresorier, Pier Simon, sengem Finanzbericht goufen vun de Keeserevisoren Pia Vrancken a Jos Schmitgen als richtig befonnt.

Mir maachen e waarmen Opruff un all Memberen, an awer och un all déi, déi et nach net sinn, eis mat der Iwwerweisung vu 25€, oder och méi, viru finanziell z’ënnertstëtzen a soen dofir villmools Merci.

No a puer Froen a konstruktiven Umierkungen vun interesséierten Nolauschterer, huet, als Vertrieder vun der Gemeng Ierpeldeng/Sauer, den 1. Schäffen, Romain Pierrard, sech a senger Uried fir dee regelméissegen offenen Austausch tëscht ‚Energie mat Verstand‘ a Gemengeresponsablen, bedankt. Och huet hien eis verséchert, de ganze Gemengerot géng eist Uleies um politesche Plang virun ënnerstëtzen an huet eng finanziell Hëllef an Aussiicht gestallt.

Den ofschléissende Patt de l’amitié woer och nach Geleeënheet fir perséinleche Gedankenaustausch.

–> Hei fannt Dir den ausféierlechen Aktivitéitsrapport vun 2021.